Вработените во ХЕС „Маврово“ несебично подадоа рака – спроведена успешна крводарителна акција

Дарувањето на крв е хуман гест со којшто може да се спаси човечки живот, а гостиварци се веќе докажани во својата хуманост и несебичност, во тој поглед. Годишно на гостиварското подрачје се собирааат околу 1.400 единици на крв.
Уште во првите денови од новата 2020-та година, започна спроведувањето на крводарителни акции. Еден од најактивните колективи на полето на крводарувањето е ХЕС „Маврово“, чии вработени уште еднаш ја потврдија солидарноста и подготвеноста да даруваат од бесценетата течност. Во денешната акција беа собрани околу 25 единици на крв.

„Во ХЕС „Маврово“ годишно се организираат четири акции и во секоја од нив се собираат по околу 25 единици на крв. Вработените се секогаш хумани и расположени да се вклучат во акциите. Апелирам сите луѓе кои се здрави и подготвени да даруваат крв, да го сторат тоа, затоа што тоа е многу хумана работа, чувството е прекрасно кога човек знае дека е корисен и спасува нечиј живот.“, рече Стојче Илиески, координатор на крводарителите во компанијата, кој самиот има дарувано крв скоро 60 пати.
Крводарителната акција во ХЕС „Маврово“ се спроведе во соработка со Црвениот Крст Гостивар и службата за трансфузиологија.