За девет месеци во Гостивар се случиле околу 180 напади, тепачки и други нарушувања на ЈРМ

Секторот за внатрешни работи Тетово за првите девет месеци од годинава бележи намалување на прекршоците од областа на јавниот ред и мир за 4 проценти.

Вкупно регистрирани во овој период се 402 нарушувања (Тетово-221 и Гостивар-181), во кои биле инволвирани 478 сторители (Тетово-315 и Гостивар-163). Најголемиот број од прекршоците се целосно расчистени и заокружени со 355 барања за поведување на прекршочна постапка (Tетово-230 и Гостивар-125).

Најмногу од регистрираните нарушувања (258) биле во град и во нив биле инволвирани машки лица (452), меѓу кои и 19 малолетници, додека другите претежно биле на возраст над 25 години (349), соопшти полицијата.

Најбројни во овој период биле физичките напади (163), тепачки (37), карање, викање и непристојно однесување (28), навредување и омаловажување на овластено службено лице (28) и така натаму. Девет од регистрираните прекршоци во годинашното деветтомесечие биле во и околу училишта, што е за 6 помалку споредено со минатата година. Најчести места на случување на ваквиот вид прекршоци се улицата и угостителските објекти.