За две недели, рецептите за лекови ќе важат само со лична карта или пасош

Од први октомври, подигање на лекови од аптеките на товар на Фондот за здравство, ќе се врши само ако со рецептот се приложи и лична карта или пасош.

Од Фондот за здравствено осигурување информираа дека, лекови ќе може да се земаат и за друг член од семејството,  при што тој што го подига лекот, треба да покаже своја лична карта, и да го каже бројот на лична карта на лицето за кое е наменет рецептот. Документ за идентификација на пациентот ќе му биде потребен и при препишување на терапијата кај лекарот.

Од следниот месец почнува и укинување на квотите во сите градови, што значи дека лекови на рецепти би требало да има во текот на целиот месец, а не како досега, кога заради исполнетите квоти по одреден ден во месецот, аптеките остануваат без лекови за осигурениците.

Фондот најавува дека во иднина ќе се воведуваат електронски рецепти. „Работиме на имплементација на соодветно електронско решение со кое ќе се олесни административното работење на здравствените установи при пропишување и издавање на лекови на рецепт, во интерес на поефикасна и подостапна здравствена услуга на осигурените лица.“, соопшти ФЗО.