За половина година 60-тина разводи во Гостивар – Станува ли бракот инстант категорија?!

Современиот начин на живот, изменетите вредности и напуштањето на традиционалните норми водат кон зачестени разводи, алармираат психолозите. На гостиварското подрачје во првата половина од годината се развеле шеесетина парови, бројка којашто не е за занемарување.

Обично се работи за помлади брачни парови, кои реагираат брзо и често непромислено во одлуките, оценуваат стручните лица.

„Генерално може да кажам дека катастрофа е со бракоразводи, многу ги има. Мое лично објаснување е дека се работи за еден бран на нова генерација која на некој начин се ослободила од да ги наречеме, старите норми на однесување. Тоа е една разгалена генерација без адекватни обрасци на однесување и решенија за конфликтите што се јавуваат. Родителите не можат да се справат со младите-децата, тие не примаат совети, многу брзо донесуваат одлука да склопат брак, без да се свесни какви обврски и што се тоа носи. Многу брзо и се разведуваат, има примери на парови кои се разведуваат за неколку месеци, или по година дена. Ова е буквално епидемија на разводи и ќе трае.“, вели Билен Карахасан, психолог во Центарот за социјална работа Гостивар.

На ниво на целата држава годишно се регистрираат по околу 1.800 разводи, а Гостивар е еден од регионите со најголема стапка на распаднати бракови.

Минатата година, Гостивар ја заокружи со околу 120 разводи. Најголемиот дел од нив меѓу помлади парови со малолетни деца.