Започна третманот на кучињата скитници во Гостивар – првите кучиња беа чипирани во Тетово

Денес официјално започна третманот на бездомни кучиња од гостиварските улици. Првите заловени животни беа транспортирани во Тетово, каде ветеринарите кои го добиле тендерот им извршија кастрација, вакцинирање и чипирање. Градоначалникот Арбен Таравари изјави дека за стационарот се` уште не се завршени сите административни процедури, па решиле да не чекаат туку да започнат со третманот на кучињата на ваков начин.

„Треба да се завршат одредени административни процедури за да се лиценцира центарот кој е лоциран кај старата касарна, а ние решивме да ги започнеме активностите пред сето тоа. Денес се започна со операција и вакцинација и на кучињата им се поставуваат чипови во увото, на кој начин се назначува градот и бројот на кучето. Ќе се обидеме што поскоро да ги третираме сите кучиња, со што граѓаните ќе бидат сигурни дека тие не се опасни.“, изјави градоначалникот, кој на прашањето зошто кучињата се донесени во Тетово, одговори дека општината водела тендерска постапка, а ветеринарите кои го добиле тендерот се од Тетово.

Кучињата скитници се голем проблем и опасност со кој граѓаните на Гостивар се соочуваат години наназад. Неретко се случува, кога се движат во чопор да напаѓаат. Најчесто се собираат во близина на автобуската станица, во големиот парк, околу градскиот пазар, приградските населби.