Чествување на Вториот Вардарски Баталјон 1915 I-ва Светска војна

Здружението на Македонците од Браничевскиот округ “Македонија“ со седиште во Пожаревац, на 8 октомври 2016 година, во соработка со општина Костолац, и месните заедници Света Петка и Стари Костолац организираше традиционално чествување за Македонците од Вториот Вардарски Баталјон мобилизирани во Српската војска за време на Првата Светска Војна 1914-1918 година, загинати на 6 октомври 1915 година во битка со Германците кај Костолачка коса.

Станува збор за мобилизирани Македонци од Македонија во Првата Светска Војна, од Гостивар, Тетово, Куманово и Кратово, кои учествувале во четири важни битки на почетокот на Првата Светска Војна што Српската војска ги водела со Австро-Унгарската и Германската армија.

Вториот Вардарски Баталјон кој активно учествувал во одбраната на Белград, Смедерево, Гроцка и други важни стратешки места. Најтешката и најкрвавата битка овој баталјон ја водел кај Стари Костолац на 6 октомври 1915 година против единиците на германската војска предводена од фердмаршалот Август фон Мекензи. Само во оваа битка погинале 627 Македонци. Во Баталјонот од околу 1.300 војници од овие краишта, загинале 1.295…

Податоци кои не смеат да се забораваат, заслужуваат да ги знаат потомците на овие луѓе. “Не по нивна желба” или “по нивна желба” Вториот Вардарски Баталјон ја покажал својата храброст и чесност. Треба сите да сме горди на овие храбри предци.