Следната година електронски пресметки за данок

Управата за јавни приходи денес ја промовираше новата електронска алатка „е-персонален данок на доход“. Преку неа се воведуваат новини и тоа: стартувајќи од од 1 јануари 2018 година почнува електронско поднесување пресметки за персонален данок на доход, додека од 2019 година треба да почне издавање на пополнета годишна даночна пријава од страна на УЈП. Со тоа ќе се овозможи поедноставување на процедурите за пријавување и плаќање на персоналниот данок на доход за фирмите и за граѓаните.

„Со новиот софтверски систем „е-персонален данок на доход“ ќе се овозможи следење во реално време на пресметките и плаќањето на Персоналниот данок на доход за физички лица од аспект на приходите остварени по сите основи, како и подобро планирање на јавните финансии за државните органи, што се планира да се имплементира во јануари 2018 година. Преку системот e-pdd.ujp.gov.mk ќе се овозможи издавање на пополнета Годишна даночна пријава од страна на УЈП во 2019 година за приходите кои граѓаните ги оствариле во 2018 година“, објаснуваат од УЈП.

Проектот „Поедноставување на процедурите за пријавување и плаќање на персонален данок на доход за даночни обврзници – физички лица, е финансиран од ЕУ во вредност од околу 100 илјади евра.