Половина август гостиварци дишеле загаден воздух

Дури 15 дена од минатиот месец во Гостивар, средните вредности на ПМ10 штетните честички во воздухот ги надминале дозволените граници. Податокот е наведен во последниот месечен извештај за квалитетот на воздухот, а се базира на вредностите за загаденоста од Мерната станица која беше поставена на почетокот од годинава во дворот на ОУ „Гоце Делчев“.

Максимумот на среднодневната вредност на ПМ10 честички изнесува 50 микрограми на метар кубен. Според извештајот, најголемо надминување е забележано на 23 август и тоа 74,5 микрограми. Од 9 се до 25 август воздухот во Гостивар речиси постојано бил загаден, со исклучок на три дена.

Во текот на целата година, средната вредност на ПМ10 честичките била над дозволеното вкупно 61 ден, од кои најмногу во февруари, март и април, кога греењето на дрва е најчестиот причинител на загадување.