Собрани триесетина единици на крв во денешната акција во Гостивар

Општинската организација на Црвениот Крст во Гостивар, по повод Денот на формирањето на Црвениот Крст, 17 март, организираше крводарителна акција.

Акцијата се спроведе во просториите на службата за трансфузиологија во гостиварската болница, а беа собрани 30-тина единици на крв. „Ова е уште една успешна крводарителна акција на гостиварскиот Црвен Крст. Им благодариме на сите хумани граѓани што се приклучија“, рече Мерита Алили, секретар на Црвениот Крст во Гостивар, која и самата денес даруваше крв.

Голем дел од граѓаните кои денес подадоа рака на трансфузиологија, се редовни во дарување на крв и во оваа прилика упатија апел до сите граѓани да се приклучат на семејството на крводарители.

„Една капка крв спасува живот, и затоа би им препорачал на сите да не се плашат и да станат крводарители“, рече гостиварецот Ненад Карафиловски, крводарител.

Минатата година, Црвениот Крст Гостивар ја заокружи со собрани 1.400 единици на крв. Свечената прослава со доделување на благодарници за хуманите крводарители во Гостивар ќе се одржи на 14 јуни, на Светскиот ден на крводарителството.