Пукање во центарот на Гостивар – нема пријава за повредени

Истрели од огнено оружје ги вознемирија гостиварци попладнево. За сега непознато лице неколкупати пукало од пиштол во центарот на градот, во близина на малиот парк. Случајот го потврдија од полицијата, но деталите се` уште не се познати.

Според првичните информации од портпаролот на СВР Тетово, Марјан Јосифоски пукањето било пријавено во ПС Гостивар во 16.20 часот по што на местото веднаш била испратена полициска екипа. При увидот биле пронајдени неколку чаури испукани од пиштол.

Сега за сега нема пријава за повредени од инцидентот. Се работи на утврдување на поединостите, кој и зошто и кон кого пукал со пиштол среде Гостивар.