Родителите чии девојчиња биле злоупотребени во групата „Јавна соба“ да пријават

Бирото за јавна безбедност го истражува случајот со групата „Јавна соба“ на сервисот за инстант пораки Телеграм, по добиена информација дека членовите споделуваат експлицитни фотографии и видеа од малолетни девојчиња.

„Таа група е креирана многу брзо и за толку кратко време има толкав голем број на учесници. Од Бирото за јавна безбедност покрената е целосна постапка за расчистување на случајот Излезено е Јавното обвинителство за наоѓање на администраторите и членовите на оваа група. Апелирам што побрзо да се заврши делот на истрагата и оние за коишто ќе се утврди дека се одговорни да сносат одговорност. Ова е апел до сите нас, до родителите и до образовните институции за поголем надзор врз децата и благовремено реагирање. Имало и претходно вакви случаи и биле расчистувани навремено. Но, не е само репресивниот елемент тука, треба и повеќе да се работи превентивно“, изјави денес  техничкиот премиер Оливер Спасовски.

Дополнителната заменичка министерка за труд и социјална политика, Санела Шкриељ апелираше родителите чиишто девојчиња биле злоупотребени во групата да ги пријават случаите.

„Информацијата ја добивме синоќа и веднаш со МВР и МОН се координиравме. МВР постапува во делот на истрагата. Сакам да упатам апел до сите родители чиишто девојчиња биле изложени на таква содржина во таа група да се обратат до Центрите за социјална работа,  нашите тимови ќе ја пружат потребната помош и поддршка.“, рече Шкриељ.