„Јавна соба“: Креаторот и еден од администраторите на групата на службен разговор во МВР

Министерство за внатрешни работи соопшти дека, Секторот за компјутерски криминал и дигитална форензика во координација со СВР Скопје извршиле идентификација на сопственикот на групата „јавна соба“ со иницијали Д.К. од Скопје и еден од администраторите на групата со иницијали М.П. од Скопје.

„Во текот на истрагата преостанува да се утврдат останатите лица кои имале администраторски и модератороски улоги во групата. Со лицата извршен е службен разговор, а во текот на утрешниот ден во соработка со надлежниот јавен обвинител од ОЈО ќе се направат дополнителни консултации и ќе бидат презентирани доказите со кои располага МВР. Од страна на МВР ќе бидат направени дополнителни анализи на содржината која беше споделена во групата со цел утврдување други нелегални активност и сторители, согласно со КЗ. Паралелно на ова, МВР во соработка со „Телеграм“, презема активности за затворање на групата и добивање други релевантни докази од интерес на истрагата. МВР апелира до членовите на групата да ја напуштат на своја иницијатива.“, се наведува во соопштението.

Групата креирана на апликацијата „Телеграм“ деновиве е во фокусот на вниманието, откако во јавноста излезе информација дека членовите споделувале и коментирале интимни фотографии на жени, но и на малолетни девојчиња.