Продолжуваат игрите на фудбалската репрезентација, од 15 часот: Македонија-Естонија

Денеска од 15 часот македонската фудбалска репрезентација ја пречекува селекцијата на Естонија.

Попладневниот натпревар е во рамките на 5.коло од Лигата на Нации, каде после 4 одиграни кола нашата селекција со 6 бодови и најдобра гол разлика се наоѓа на првото место во групата 2, од Ц лигата, пред Грузија, Ерменија и Естонија.

Дефинитинвно нашата селекција денеска нема да настапи во најсилен состав, Горан Пандев е ослободен од обврските, на голот нема да биде ни Столе Димитриевски кој поради црвен картон е суспендиран на два натпревари, Енис Барди и Аријан Адеми имаат повреди, Алиоски нема да игра поради жолти картони, а ќе одморат и Муслиу и Ристовски. Па така „топката“ повторно е кај Ангеловски, кој треба од останатие фудбалери да избере 11 со кои ќе ја победи Естонија.

На официјалната прес-конференција за денешниот натпревар селекторот на македонската А репрезентација, Игор Ангеловски рече дека после голем пласман нормално е емотивно да се испразнети, но и дека како репрезентација учесник на ЕП, мора да продолжат да победуваат.

– Истакнав и претходно дека главна цел е пласман на ЕП, ама моментално сме на прво место во групата и ќе дадеме се да бидеме први во Лигата на нации. Нормално е по голем пласман емоциите да се испразнети, ама кога играш нов меч за Македонија, сите ќе се потрудат максимално. Имаме доволно квалитет за победа, па да одиме на  Кипар и таму да решаваме за првото место.

Втората можност пак да бидеме шампиони во ова натпреварување мора да не мотивира. Настапуваме како репрезентација која настапува на ЕП и тоа мора со сите сили да го браниме. Секогаш има мотивации и сакаме да бидеме први во Лигата на нациите. Ќе се обидам да ја изнесам најдобрата тактичка определба според тимот на располагање. Доволно време сме заедно и добро знаеме што треба да направиме на теренот, смета Ангеловски.

Според најавите, фудбалерите ќе истрчаат во формација 3-4-1-2, во следниот состав:
Шишковски – Бејтулаи, Велковски, Зајков – Костадинов, Николов, Спировски, Трајковски – Елмас – Несторовски, Тричковски.