Единствениот музичар на светот кој свири на инструменти од мраз

Свирел концерти во внатрешноста на замрзнати водопади, на врвот на 3000 метри високи глечери, во масивни ледени сводови на температура од -33 степени целзиусови.

Иако можеби звучи чудно, за Терје Исунгсет, првиот и единствениот леден музичар во светот, овие услови за работа се составен дел од работата, пренесува СиЕнЕн. Овој норвежанец свири на ледени, замрзнати инструменти дваесетина години и основач е на норвешкиот леден фестивал во Геил.

Љубовта кон “ледената музика“ започнала кога имал 20 години, кога бил повикан да свири на концерт во внатрешноста на замрзнат водопад.

“Како музичар одлучив да работам со природата што ме опкружува и пробав инструменти од мраз“ – вели Исунгсет.

Како перкусионист, започнал со едноставни ледени ѕвона, користејќи сталактити кои се формираат во суровата норвешка зима. Од тогаш, неговиот репертоар се проширил на тапани, тромбон, харфа, труба… Но освен што свири, тој направил и различни инструменти, од мраз се разбира.

Еден од најнеобичните инструменти кои ги направил бил леден тромбон изрезбан од глечер стар 2500 години во Норвешка. Траел само 50 настапи, но тоа, според ледените стандарди, е долг период.