Самохрана мајка со 2 деца од Гостивар без покрив над глава, изгоре станот што им го подари Халил Кастрати

2021-вата година за Џемиле Хорман од Гостивар почна мачно и тешко. Оваа самохрана мајка со двете дечиња, на возратс од 5 и 10 години остана без покрив над главата. Станот, во населбата Седма зона, кој бил добиен како подарок од косовскиот хуманитарец Халил Кастрати целосно и‘ изгоре во пожар. 40 годишната жена е невработена и нема можност сама да го оспособи го живеалиштето со основни услови. Ни се обрати со надеж дека институциите, фирмите, хуманите граѓани ќе и помогнат, за да не остане надвор на студот со дечињата.

„Пожарот беше страшен. Прво од склопката почна да излегува чад. Децата спиеја, брат ми беше овде кај мене и тој спиеше. Одеднаш се запали вратата, почнав да ги будам децата Рахман и Емир, да ги спасам, и по брат ми викнав,  зашто многу почна брзо да гори. Станавме сите и рековме да се спасиме ние. Многу трауми преживуваме и јас и децата, сега немаме ништо, се‘ ни изгоре, останавме на улица. Одам по пријатели, каде ќе не приберат да преспиеме. Едното дете кај едни го оставам, другото на друго место, како што може. Ова живот ли е, да се влечеш по улици, не можам да ги оставам по улици моите две деца. Моментално не работам, од социјално што даваат леб да се купи, ако ме викнат некаде ќе одат да чистам, било што. Ги молам сите луѓе, фирми што може да ни помогнат да го санираме станот и да се вратиме дома“, вели Џемиле.

Уште на влегување во зградата се‘ уште чувствува мирис на изгорено и чад. Станот на Џемиле е на првиот кат, во него се‘ е пеплосано, глетката ужасува.

Поголемиот син, десетгодишниот Рахман е ученик во четврто одделение. По пожарот не може ни да се вклучува во онлајн настава, затоа што во огнот му изгорел и телефонот, преку кој учел. Ова храбро дете поминало страшни моменти кога се запалил станот.

„Мајка ми дојде до соба каде бевме јас и брат ми, и видов како пожарот збувна до нејзиниот стомак, се изгоре. Почна да вика. Со чичко ми заедно зедоа кофи со вода да истураат, ама почна многу брзо да гори се‘, не се угасна, се зафати и креветот. Ми беше многу страв, мајка ми почна да се гуши, сите се уплашивме. Мајка ми и чичко ми не‘ кренаа и не‘ извадија на балконот. Среќа што имаше луѓе, дојде и пожарната, па не‘ спасија. Сега после тоа, секој ден се тресам од страв.“, рече Рахман.

Во станот Џемиле со своите деца живеела последните три години, откако им го подарил Кастрати. Тој го забележал малиот Рахман дека има талент за фудбал и разбрал дека децата со самохраната мајка живеат во мизерни услови, им купил стан. За жал, пожарот што се случи минатиот месец, го врати ова семејство во канџите на бедата.

Секој што сака да им помогне може да ги исконтактира на тел.број 071-695-640. Парични средства може да се уплатат на сметката:

200002 990525997 Стопанска Банка

Џемила Хорман