Гостивар ќе бара помош од турска општина за фекална канализација во Горна Бањица

Делегација од турската општина Ејуп, предводена од Ахмет Туфекчи потпретседател на општината, денес беше во посета на Гостивар и се сретна со градоначалникот Невзат Бејта. На средбата се зборуваше за продлабочување на соработката и збратимување на градовите. Значаен акцент беше ставен на можноста турската општина да го поддржи проектот за изградба на фекална канализација во селото Горна Бањица.

„Проектот за канализација во село Горна Бањица е изработен, но не е рализиран до сега поради тоа што многу чини финансиски. Добро е да се разгледа можноста како Општина Ејуп може да помогне во реализацијата на овој проект, во вредност од околу 700 илјади евра“, изјави Невзат Бејта, градоначалник на Гостивар

„Во општина Ејуп живеат околу 400 илјади жители, а околу 40% од населението се од различни земји. Голем дел од нив доаѓаат и од Гостивар, Тетово, Скопје. Затоа остваруваме добра соработка со вашите општини. Се надеваме дека добрите односи со општина Гостивар ќе продолжат и во иднина и ќе резултираат со збратимување на градовите“, рече Ахмет Туфекчи, потпретседател на општина Ејуп.

Двете општини за месецот Рамазан, традиционално ќе организираат заеднички ифтар во Гостивар. Како датум е одреден 10-ти јуни.

Средбата со турската делегација во општина Гостивар заврши со разменување на симболични подароци.