Ангеловски ги избра стартните 11 кои ќе испишат историја

За помалку од 45 минути македонската фудбалска репрезентација на „Динамо арена“ во Тбилиси, ќе го започне најважниот фудбалски натпревар во изминативе 30 години.

Селекторот Ангеловски го предаде списокот до службените лица со кои ќе истрча на вечерашниот дуел против Грузија.

Во формација 3-5-2 на голот ќе застане Столе Димитриевски. Во одбрамбената линија ќе бранат Егзон Бејтулаи – Дарко Велковски – и гостиварецот Висар Муслиу. Кога ќе се нашите во напад како офанзивни, кога се браниме како дефанзивни играчи, страничните линии ќе ги покриваат лево Џани Алиоски и десно Стефан Ристовски. Добра вест е што Аријан Адеми „стисна“ заби и ќе заигра од првиот минут, заедно со Бобан Николов, позади Елиф Елмас кон кого ќе бидат свртени многу погледи вечерва. Најистурени, најголема опасност по голот на Грузија ќе бидат Илија Несторовски и капитенот Горан Пандев.

Од клупата своја шанса ќе чекаат: Богатинов, Костадинов, Шишковски, Спировски, Стојановски, Тотре, Трајковски, Тричковски и Зајков.

Натпреварот започнува во 18 часот.

Напред момци!