Баобаб авенијатa во Мадагаскар

Баобаб авенијата, уште позната и како Алеа на Баобаб дрвото, се наоѓа во Мадагаскар, но ваквите глетки ги има и уште во неколку други делови од Африка. Овој предел привлекува патници од целиот свет, што го прави една од најпосетуваните локации во регионот, а од 2007-ма година официјално стана и национелен споменик на Мадагаскар.

Десетина стебла високи повеќе од 30 метри опкружуваат стар и тесен прашкаст пат. Локално познати како “ренала“ (мајка на шумата), овие стебла припаѓаат на највисоките баобаби на светот Адансониа грандидиери, наречени по француските ботаничари од 19-ти век, Мишел Адансон и Алфред Грандидиер.

Авенијата е често преполна со туристи како и со фотографи во текот на заоѓањето на сонцето кои сакаат да го забележат овој величенствен момент. Во близина се слушаат песни од локалните дечиња кои продаваат овошје и нудат разновидно цвеќе во замена за слатки.

Сепак оваа глетка се должи на луѓето кои го обликувале пределот уништувајќи стотици стебла во текот на годините, иако сегашниве стебла израснале сами. За среќа ги преживеале големите пожари кои ги предизвикале луѓето, а тие денес само потсетуваат на величенствената шума од баобаби која некогаш била тука.