Без прекршување на полицискиот час во Гостивар – апел да нема групирања

Викенд полицискиот час почна вчера (сабота) од 15 часот и ќе трае до утре (понеделник) до 5 наутро. Според информациите од Секторот за внатрешни работи, на гостиварското подрачје изминатото деноноќие никој не ја прекршил забраната за ограничено движење, додека во тетовскиот регион регистрирани се три прекршувања.

Граѓаните кои се во изолација и самоизолација биле дисциплинирани и ја почитувале мерката. Полициските службеници извршиле контрола на 152 лица со решенија за изолација (Тетово-137 и Гостивар-15), како и на 158 лица со потпишана изјава за самоизолација (Тетово-94 и Гостивар-64) и не регистрирале прекршувања во тој дел.

Оценка на полицијата е дека граѓаните генерално ги почитуваат препораките и мерките за заштита од ширење на коронавирусот и потенцираат дека повеќе внимание треба да се обрне во делот на одржувањето на социјалната дистанца и групирањето.

„Апелираме граѓаните да не се групираат повеќе од двајца, како што е определено во одлуката, и да ја одржуваат препорачаната социјална дистанца од 2 метри. Исто така, упатуваме апел да ги почитуваат новодонесените мерки за задолително користење на заштитна опрема на лицето во затворени простории како маркети, аптеки, банки и слично, на отворен простор како пазарите“, нагласи портпаролот на СВР Тетово, Марјан Јосифоски.

Во државен карантин, кој е под надлежност на Генералниот секретаријат на Владата, во хотелите во Маврово се наоѓаат 159 лица.