Божиновска од Стоп Русино: Придружете се, секој да даде придонес за нашите деца да дишат чист воздух

Блокадата на Русино кај Гостивар почна на 2-ри август и трае веќе 40 дена. Ја иницираше граѓанска иницијатива, по серијата пожари коишто се случија на таканаречената депонија, а го загушија градот во чад и смрдеа.

Да се организира 24 часовна блокада не е едноставна работа, велат активистите. Потребни се луѓе што ќе дежураат во смени и во текот на денот и ноќе, за да го контролираат транспортот на ѓубре, кој моментално е дозволен само за камионите од Гостивар.

Соња Божиновска од граѓанската иницијатива, при денешното четврто по ред продолжување на блокадата, упати апел до сите граѓани да дадат свој придонес во борбата за чист воздух и здрава средина, без национална, верска или политичка поделба.

„Сакам да апелирам да го тргнеме егото настрана, да не се докажуваме кој сме, што сме, туку на овие 20-30 активни членови кои секојдневно се на блокадата да им дадеме поддршка. Дали со некои намирници, со присуство на смена или на било кој друг начин, затоа што да се организира 40 дена блокада е огромен процес и за големи организации. Ние сме само обична граѓанска иницијатива која се бори за чист воздух. Јас имам 3 деца кои сакам да ги растам во Гостивар и ќе продолжам да се борам, за да ги израснам во Гостивар. Не е идејата да се иселиме од Гостивар сите. Затоа ве повикувам, Стоп Русино постои  – придружете се. Во групата на фејбуск броиме над 8.000 члена, сите кои се заинтересирани нека не контактираат за да ги организираме смените, затоа што не е фер, некој да биде 24 часа на смена, а некој да не се појави. И моето дете и нивните деца дишат чист возадух 40 дена заради таа блокада“, рече Божиновска.

Главното барање на граѓаните е да се затвори и дислоцира Русино

„Пораката е јасна, целта е да се дислоцира Русино. Пораката институциите ја знаат, нашите барања им се доставени, но очигледно не се разгледани и роковите ги пробиваат. Имаме сознанија дека во помалите полошки општини се создаваат диви депонии, за кои никаков глас не се крева. Градоначалниците не преземаат ништо, зашто ако преземаат, побрзо ќе се одржи состанокот со граѓанската иницијатива Стоп Русино и нешто ќе се реши. Не сме тука за да поддржуваме партиски, национално или верски. Тука сме да најдеме решение за Русино по некои европски стандарди што ги очекуваме. Буквално сите партии ги повикуваме, сите тие пратеници и советници што сме ги изгласале од Гостивар да дадат поддршка. Решението не е кај нас, туку кај институциите. Ние сме само тука да ги поттикнеме институциите.“, нагласи Божиновска.