DAVA Гостивар ќе дели само зготвена храна, имало злоупотреби со пакетите

Поединци ја злоупотребувале помошта во пакети со прехранбени продукти од хуманитарната организација DAVA во Гостивар, поради што организацијата ќе го смени начинот на работа. На загрозените граѓани и семејства ќе им се делат само оброци подготвени во народната кујна на организацијата, додека пакетите се укинуваат.

„Решивме да направиме промени во начинот на кој работиме. Прекинуваме со делење на хуманитарните пакети и за семејствата кои користеле ваков вид помош ќе обезбедиме храна зготвена во нашата кујна. Тоа го правиме затоа што одредени поединци имаат тенденција да ги злоупотребуваат овие пакети и решивме целосно да ги укинеме за да избегнеме секаква можност за злоупотреба. Ќе направиме и проверка на списоците, ќе ги посетиме населбите, селата, ќе контактираме со одговорните, како што се претседателите на сите месни заедници, свештените лица, ќе се консултираме со нив за семејствата на кои навистина им е потребна помош и во оваа форма, храната ќе ја прифаќаат само семејствата на кои навистина им е потребна.“, појасни претседателот на организацијата, Муса Хусеин.

Бројот на луѓе кои се обраќаат кај нив за помош постојано се зголемува.

„За жал, листата на оние на кои им е потребна помош секој ден расте, од 380 достигна 450. Ја користам оваа прилика да апелирам до секој што знае загрозено семејство да ни обрати за да помогнеме.“, апелира Хусеин.

DAVA продолжува со доставување на лекови на луѓе кои не се во можност сами да ги обезбедат. Таква помош е обезбедена за скоро 90 граѓани.

Периодот со почетокот на новата учебна одина, организацијата посебно внимание посвети на децата без родители и за 48 деца од регионот на Гостивар обезбеди се‘ што е потребно за на училиште, а претходно за Бајрам и месо од курбан во поголеми количини.