Дебата во Гостивар за промоција на еднаквост и вклученост

Во рамки на иницијативата за кревање на свеста кај младите за еднаквост, вклученост и почитување на разликите насловена „Остави трага“, вечерва во Гостивар се одржа дебата со повеќе говорници и настап на музичари, актери и учество на уметници.

„Вечерва оставивме трага во Гостивар, со инспиративни говорници ги поттикнуваме младите на поголема општествена вклученост. Зборувавме за можностите на младите во нашата земја и за заложбите кои се потребни за остварување на соништата. Голема благодарност на сите кои несебично се вклучуваат во активностите кои ги спроведуваме“, рече министерката на труд и социјала, Јованка Тренчевска, една од говорниците.

На дебатата обраќање имаа и Евроамбасадорот Дејвид Гир, државната секретарка во МВР Магдалена Несторовска, советничката во гостиварскиот Совет, Ема Нешковска, заменик градоначалникот на Општина Гостивар, Намик Дурмиши и други.

Настанот се организираше како дел од караванот на Институтот за добро управување и евроатлантски перспективи заедно со Министерството за труд и социјална политика, со поддршка на проектот „Борба против омразата и нетолеранцијата во Северна Македонија“ од заедничката програма на Европската Унија и Совет на Европа, „Хоризонтален инструмент за Западен Балкан и Турција“.