Денес последен рок: ЈП за патишта вработува 14 инкасанти на патарините низ Македонија

Јавното претпријатие за државни патишта отвори оглас за 14 вработувања кои се однесуваат на работно место инкасанти за наплата на патарина, во Одделението за наплата на патарина и контрола, Сектор за оддржување, заштита на патишта и наплата на патарина. Рокот за поднесување пријави истекува денес, 9-ти јули. Вработувањето ќе биде на определено време, до 31.12.2018 година.

Според наведеното во огласот основната плата изнесува 19.760 денари. Кандидатите треба да имаат средна стручна спрема, со или без работно искуство во струката, а работното време е распоредено во две смени и трае 12 часа. Предвидени се и работа на празник и ноќна работа.

Освен инкасанти, ЈП бара и еден Советник за човечки ресурси и општи работи во Oдделението за човечки ресурси и општи работи во Секторот за правни работи, човечки ресурси и општи работи. За ова работно место предвидена е основна плата од  33.540, 00 денари, а потребно е високо образование од областа на правните науки.

„Заинтересираните кандидати можат да аплицираат за вработување со доставување на пријава за вработување со контакт податоци и документи/докази за исполнување на условите за вработување на адреса на Јавното претпријатие: ул. „Даме Груев” бр. 14 1000 Скопје или во писарницата на Јавното претпријатие за државни патишта, со назнака „за јавен оглас за пријавување на кандидати за вработување во Јавното претпријатие за државни патишта”, наведуваат од ЈП.