Денес се празнува Светото Благовештение

Според календарот на Македонската православна црква, денес е празникот  Благовештение на Пресвета Богородица меѓу народот познат како Благовец. Во раното Христијанство овој празник имал различни имиња: Зачнувањето на Христа, Благовештение за Христа, Почеток на откупувањето, Благовештение од Ангелот на Марија и дури во VII век на Исток и на Запад бил наречен Благовештение на Пресвета Богородица.

Свето Благовештение се вбројува во постојаните празници и секогаш е на 7 април според новиот, или на 25 март според стариот календар. Повеќе аспекти од чинот на Благовештението заслужуваат посебно внимание. Пред сè, единството на природното и натприродното што покажува дека зачнувањето и носењето во утробата, но и раѓањето Христово, се случиле природно и натприродно. Натприродно, затоа што се случло творечки од Пресветиот Дух, а не со семе. Природно, затоа што носењето во утробата било исто на начинот на којшто се носи младенец во утробата.

Именден денес празнуваат: Благој, Благица, Блаже, Благојка, Блага, Благун…

Постои верување дека на Благовец и раната не боли, па затоа се негува обичај на малите деца денес да им се ставаат обетки.