Дијабетичарите најавуваат тужба: 8 месеци недостиг на терапија и помагала, каде отишле парите, во нормална држава ова го нема!

Здруженијата на граѓани со дијабетес во Македонија сериозно размислуваат за покренување тужба против Министерството за здравство поради недостигот на антидијабетна терапија, ленти, глукомери и други помагала, кој се провлекува со месеци. Претседателот на здружението на дијабетичари во Гостивар, Велко Бобароски вели дека пациентите трпат поради бавноста и неажурноста на институциите да им го обезбедат тоа што им следува во делот на здравствената заштита.

„Проблемот е во Министерството за здравство, пред се‘. Не би потенцирал кој министер, што министер, не е самиот министер виновен, тој си има тимови од луѓе, советници, тие кои треба да знаат кога, што се распишуваат тендерите. Бавноста и неажурноста на самите тие луѓе доведува до тоа што ни се случува, недостиг на инсулин и помагала. Осум месеци траат тендерски постапки, во кој период „топката“ се префрла од еден на друг. Во нормална држава, каде се’ функционира, ова го нема. Да, сме имале прием, разговори на кои ни велат нема проблем, ќе биде за една недела, но таа недела се стори осум месеци, а тоа ќе доведе до тужба кон МЗ. Ќе се оди и со порадикален чекор, односно да одиме со  меѓународна тужба, немаме друг механизам, се разгледуваат сериозно опциите. Осум месеци одбивано е за здравствено на тие пациенти, таа терапија отишла, прашањето е каде отишле парите, значи некаде завршиле тие пари. А, ваму луѓе ти страдаат и се борат за живот“, кажа Бобароски во емисијата „Минути за секого“ во продукција на Gostivarpress.mk.

Пред два дена Сојузот на дијабетирачи поднесе претставка до Министерството за здравство со барање навреме да ја добиваат терапијата и помагалата, кои им се гарантирани со Устав и закон.

Целата емисија на тема Дијабетес може да ја проследите на Јутуб каналот на Gostivarpress.mk.