Ф4 расплет ни на повидок: КК Гостивар денеска мора да го совлада ТФТ Скопје во „Младост“

Вчера и денес на програмата е 5. коло од кошаркарската Суперлига. Во трката за завршниот Ф4, првите две места Пелистер и МЗТ Скопје си ги „чекираа“ од поодамна, останува трката за останатите две за кои се борат четири екипи Еуроникел, ТФТ Скопје, КК Гостивар и од вчера по победата над кавадарчани и Феникс 2010.

После 4 одиграни кола расплетот не е ни на повидок. Секоја екипа има еднакви шанси и сами си одлучуваат за својата судбина, односно влез во завршниот Плеј-оф.

КК Гостивар по поразот од Феникс во првото коло, одлучи најважниот дел на првенството да го доигра без прв тренер, по раскинувањето со Јончевски, гостиварци од клупата ги води помошникот Никола Димитриевски, со кого го совладаа Пелистер во Битола и загубија од МЗТ Скопје на гостински терен. Денеска во еден од најважните натпревари сезонава ќе го пречекаат ТФТ Скопје.

Екипата од Тафталиџе и актуелниот победник во КУП натпреварувањето, во денешниот дуел влегува од 4. позиција на табелата со 41 бод, 15 победи и 11 порази. Додека гостиварци од 6. позиција со 40 бодови и скор од 14 победи и 12 порази. Во последните пет меѓусебни пресметки избраниците на Боро Смилковски имаат победа повеќе (3-2), но никогаш немаат победа во „Младост“.

За екипата на Гостивар, која по поразот од Феникс сама се отпиша, па после победата над Пелистер повторно сама се запиша во трката за Ф4, во овој дуел нема никакви други опции освен победа, со која поприлично ќе си ги зголеми шансите за остварување на целта.

Натпреварот се игра од 18 часот. На интернет дуелот може да го следите ТУКА.