Филип Деркоски најбрз на вториот Богородичен пливачки маратон „Леуново 2020“

Вчера во водите на Мавровско езеро се одржа вториот Богородичен пливачки маратон „Леуново 2020“, кој е дел од Македонскиот куп во далечинско пливање. Маратонот е дел од одбележувањето на празникот „Успение на Пресевета Богородица“ во село Леуново, кој традиционално се прославува на 28 август.

На годинешното издание „Леуново 2020“ учествуваа 48 пливачи од десетина клубови од Македонија, натпреварувајќи се на 2,5 километарската кружна патека поставена во водите под хотел Радика, на источната страна на Мавровското езеро.

Филип Деркоски како минатата така и оваа година прв мина низ целта. Деркоски  ја преплива патеката за 33 минути и 38 секунди, со задоцнување од 2 секунди втор низ целта мина Александар Илиевски, трет заврши Иван Трпчевски, со време 38 минути и 43 секунди.

Во категоријата 15 до 17 години мажи, најбрз беше Андреј Стојановски, со време 35 минути и 6 секунди, втор Давид Тануровски, третото место му припадна на Христо Динев.

Во најмладата категорија мажи 12 до 14 години, првото место го освои Михаил Велков со време 38 минути и 34 секунди, второпласран беше Јован Јанковски, трет заврши Симон Попоски.

Кај дамите, во категорија 15 до 18 години, Јана Костадиновска имаше најдобро време, стазата за мина за 38 минути и 35 секунди, Миа Блажеска Еминова заврши втора, Калина Стојчевска беше трета.

Во најмладата категорија жени, 12 до 14 години, Калина Стојановска го освои првото место, Јана Милковска втора, како третопласирана низ целта мина Софија Дамјанова.

Прогласувањето на победниците и доделување на медалите се одржа веднаш по завршувањето на маратонот. Медалите на најспешните им ги додели директорот на ЈУНП Маврово, Самир Ајдини, кој им честиташе на победниците и организаторитите на овој настан.

Технички организатор на вториот Богородичен пливачки маратон „Леуново 2020“, беше Пливачкиот клуб Бета Шаркс од Скопје, под капата на Националната пливачка федерација, а истиот го помогнаа: Општина Маврово-Ростуше, Национален парк Маврово, Ресорт Маврово и Ски центарот и Министерството за одбрана на Република Северна Македонија.