Гостиварскиот Сојуз на борци го осуди сквернавењето на бистите на народните херои во Анови

Претседателството на Сојузот на борци од Гостивар го осуди сквернавењето на спомениците на народните херои Чеде Филипоски и Злате Малакоски во Маврови Анови.  Бистите, минатата недела беа откорнати од постаментите од страна на непознат сторител.

„Ова е уште еден во низата вандалски акти извршени на спомениците и спомен обележјата од НОАВМ. Најостро го осудуваме овој чин и се прашуваме кому му пречат овие споменици кои се подигнати како почит, сеќавање и благодарност кон сите паднати борци од сите националности: Македонци, Албанци, Турци, Роми, Срби, Власи. Овој нецивилизиран чин е директен удар по етничкиот соживот. Бараме надлежните органи да преземат мерки да ги пронајдат сторителите и соодветно да ги санкционираат“, изјави Радислав Ѓиноски, претседател на Сојуз на борци Гостивар

Гостиварската боречка организација ги повика на соработка локалните самоуправи и им порача да ја исполнуваат законската обврска за одржување на спомен обележјата од НОВ, потенцирајќи дека за таа намена изминатите 27 години во независна Македонија не бил издвоен ниту денар.