Инфо сесија во Гостивар: Кој и како може да добие пари од буџетот за проекти?

Граѓани, невладини организации и спортски клубови имаа можност подетално да се запознаат со условите и начинот на аплицирање за огласот објавен од Општина Гостивар, кој се однесува на финансиска поддршка за реализација на проекти во тековната година. На информативната сесија што се одржа вчера во општинската сала пред заинтересираните за искористување на ваквата можност зборуваа претставници на општината.

„Заинтересираните граѓани, невладини организации и спортски клубови кои имаат проектни активности со позитивно влијание врз подигање и развој на културата, спортот, животната средина, социјална заштита и еднакви можности, може да се пријават на огласот до 15 февруари. Активностите на здруженијата/клубовите ќе бидат поддржани во минимален износ од 30.000 до максимален износ од 180.000 денари, додека активностите на физичките лица ќе бидат поддржани во минимален износ од 10.000 до максимален износ од 30.000 денари по проект“, беше речено на информативната сесија.

Поднесените апликации ќе се оценуваат според критериумите предвидени во огласот, а резултатите ќе бидат објавени на веб страницата на општината.