Казни за продажба и употреба на пиротехнички средства

Во пресрет на новогодишните празници во Гостивар петардите стануваат вообичаена „играчка“ за децата, но и за возрасните и се употребуваат без да се размислува за последиицте. Токму заради опасноста и ризикот по луѓето што го носат, полицијата периодов ќе спроведува засилени контроли за откривање и спречување продажба и користење на петарди и други пиротехнички средства.-Во функција на планираното превенирање на ваквите незаконски активности, на трговците, родителите и посебно на учениците повторно им се укажува дека продавањето, односно купувањето и активирањето петарди на јавни места, на улица, во дворови, влезови на станбени згради и слично, претставува законски прекршок, за кој е предвидена глоба од 200 до 500 евра, соопштуваат од Секторот за внатрешни работи.

Набавувањето и дистрибуирање пиротехника пак на поголеми количини е спротивно на Кривичниот законик на Република Македонија и се казнува со затвор од најмалку пет години.

Полицијата апелира пред се до учениците од основните училишта, да не ги земаат во раце ваквите опасни играчки, зашто тие можат брзо и лесно да предизвикаат сериозни повреди на рацете, очите и другите делови од телото.