КК Гостивар има 1-0 против Работнички во разигрувањето за титула

КК Гостивар ја продолжи низата на натпревари без пораз на домашен терен и во четвртфиналната серија од плеј-офот која започна вчера, а за противник го има Работнички.

Гостиварци веќе имаат предност од 1-0, откако вчера пред своја публика во Младост ја совладаа екипата на Работнички со резултат 76-69.

Дуелот започна изедначено, но и доста ефикасно на двете страни, двете екипи повеќе беа сконцентрирани на нападот што донесе атрактивна кошарка во првиот дел, во која подобро се снајдоа домаќините и на полувреме имаа +4 поени предност, при резултат 41-37.

Во вториот дел грузиецот од редовите на Гостивар, Георги Корсантија ги зеде работите во свои раце, како под својот кош така и по кошот на противникот. Со вкупно 26 поени, 14 скока, 2 асистенции и индекс 36 беше најефикасен на натпреварот и нерешлива енигма за избраниците на Димитар Мираковски, пресуден икс-фактор кои останатите играчи на Гостивар знаеа како да го искористат, и во последните минути кога Работнички резултатски се врати во игра, Корсантија со неговите 2 плус 1 не дозволи драма во Младост. КК Гостивар ја запиша првата победа во четвртфиналната пресметка, добивајќи го натпреварот 76-69.

Ефремовски и Вучковиќ беа вистинска поддршка на расположениот Грузиец кои постигнаа по 17, а Жигон запиша 13 поени. Некогашниот „гостиварец“, Ѓелетовиќ беше најдобар кај Работнички со 23 поени.

Следниот дуел во кој екипата на Работнички нема право на грешка е закажан на средина од следната недела во Скопје.

Во втората четвртфинална пресметка Еуроникел славеше на гостувањето кај ТФТ Скопје 62-70, денес играат Пелистер – Феникс 2010 и МЗТ Скопје – Кожув.