Нападната новинарска екипа во Ѓурѓевиште, приведено е едно лице

Новинар и снимател од ТВ Полог попладнево биле нападнати во селото Ѓурѓевиште, каде отишле поради снимање на видео за тамошното основно училиште.

Новинарот Невриј Адеми и снимателот Збулим Максути станале мета на лице, кое според пријавеното им се заканувало и со секира. Лицето попладнево било приведено во полиција.

СВР Тетово  соопшти дека Полициски службеници на Одделението за внатрешни работи Гостивар, околу 17 часот и 30 минути, во Топлица, го лишиле од слобода 59-годишниот Б.Е.од Ѓурѓевиште, по добиена пријава дека пред тоа го нападнал 23-годишниот Н.А.(новинар) од гостиварско Калиште и во раката имал секира со која му се заканувал. Приведеното лице во консултација и координација со Јавен обвинител, задржано е во Полициската станица Гостивар за целосно расчистување на случајот, по што ќе следи соодветен поднесок, извести полицијата.

За случајот реагираше Здружението на новинари.

„ЗНМ веднаш контактираше со новинарот на ТВ Полог Неври Адеми и тој ни потври за овој инцидент и ни даде конкретни информации дека: ,,Додека снимавме и работевме на репортажата со колегата снимател Збулим, ни се доближи лицето Бурхан Хамити и откако ни се обрати со погрдни зборови, ме фати за глава и ме буткаше по скали. Потоа слезе во училишниот двор и почна да не брка со секира. Ние брзо влеговме во автомобилот и се упативме до полициска станица да го пријавиме нападот, а напаѓачот цело време не следеше со неговиот автомобил дури до селото Неготино, гостиварско,“ изјави Адеми. ЗНМ бара од Министерството за внатрешни работи да спроведе брза и ефикасна истрага во интерес на пронаоѓање и санкционирање на напаѓачот. Потенцираме дека заканите по живот се кривични дела предвидени во Кривичниот законик а МВР и ОЈО, треба итно да ги истражат и процесираат со цел да ги казнат оние кои го прекршуваат законот но и да превенираат евентуални вакви кривични дела во иднина.“, се вели во соопштението на ЗНМ.