Откриени неисправни автобуси и комбиња во Гостивар, казни до 400 евра

Секторот за внатрешни работи Тетово извести дека продолжува со летните контролни активности во сообраќајот. Вчера (16 август) од 9 до 14 часот била спроведена акциска контрола на возила кои вршат јавен превоз на патници, пред се автобуси, такси комбиња и други возила.

При контролата откриени и санкционирани се вкупно 6 возила (ТЕ-5 и ГВ-1) со неисправни сопирачки, 1 (ГВ) возило со неисправни други уреди и 1 (ГВ) возило со неизвршен технички преглед. Неисправните возила веднаш се исклучени од сообраќај и на лицата кои ги управувале изготвени им се законски предвидените поднесоци. Оние со неисправни сопирачки, согласно член  42 од Законот за возила ќе се соочат со парични глоби од 400 евра во денарска противвредност.

„Секторот за внатрешни работи Тетово повторно со апел до возачите-учесници во јавниот превоз на патници редовно да ја проверуваат техничката исправност на нивните возила, посебно ако планираат подолги дестинации, но и воопшто. Зашто, на тој начин придонесуваат за поголема лична и безбедност на патниците. До возачите се апелира, исто така, да ја прилагодат брзината според условите на патот, да не тргнуваат кон туристичките центри недоволно одморени и под дејство на алкохол и целосно да ги почитуваат сообраќајните знаци, правила и прописи.“, наведува портпаролот на СВР Тетово, Марјан Јосифоски.