Отпор кон МРП и ХПВ вакцините во Гостивар – лекарите повикуваат на редовна вакцинација

Антивакциналните кампањи го намалија процентот на вакцинирани деца во гостиварско. Изминатите години, значителен дел од родителите носат одлука да ги избегнат задолжителните вакцини од календарот за имунизација. Лекарите потврдуваат дека се јавува отпор кон вакцинацијата и потенцираат дека тоа доаѓа под влијание на кампањите кои се особено актуелни по социјалните мрежи. Предупредуваат дека таквиот тренд носи висок ризик за појава на епидемии на заразни болести кај децата. Точните податоците се уште се обработуваат, но од епидемиолошкото одделение во Гостивар велат дека најголем отпор има кон вакцините против МРП (морбили, рубеола,заушки) и ХПВ (хуманопапилома вирус).

По повод  Европската недела на имунизација, медицинските лица испраќаат  апел до родителите редовно да ги вакцинираат децата.

„Вакцините се сигурни, безбедни и ефикасни и обезбедуваат заштита на детето против болеста за која се вакцинира. Спречуваат заболување, инвалидност, па во некои случаи и смртност. Со оглед на антивакциналните кампањи, родителите се дезинформирани и наша цел е да го подигнеме нивото на информираност за бенефитот од редовна вакцинација, и од друга страна за ризикот во кој го ставаат детето и околината, доколку ги избегнуваат задолжителните вакцини.“, вели епидемиологот Примариус д-р Војислав Огњаноски.

Лекарите како пример ја посочуваат епидемијата на морбили (мали сипаници) во Романија со 12 илјади заболени и 45 мртви. „Благодарение на вакцините, одредени заразни болести се ставени под контрола, а има и такви кои во Република Македонија се целосно искоренети и тоа болести од кои во минатото заболувале голем број на деца, со сериозни последици.“, наведуваат медицинските лица.

Во целата земја опфатот на имунизација со МРП вакцината бележи опаѓање. Кај родителите се јави страв од оваа вакцина поради информациите што се пласираат дека таа е главен виновник за појава на аутизмот.

Европската недела на имунизација во Гостивар се одбележува со повеќе активности: едукација на родители, делење флаери со информации за вакцините, вакцинирање на терен и слично.