Позитивни на ковид и лица во изолација за гласање може да се пријават до 11-ти октомври

Избирачите кои се во домашен карантин заради позитивен тест на КОВИД-19 и избирачите на кои им е одредена мерка самоизолација со решение од Државен санитарен и здравствен инспекторат, а сакаат да гласаат треба за тоа да ја известат општинската изборна комисија најдоцна 5 дена пред денот определен за гласање, односно до 11 октомври на полноќ.

Со доставување на известувањето до општинската изборна комисија, (преку полномошник или електронски пат) комисијата по службена должност ги прибира податоците од Државниот санитарен и здравствен инспекторат за лицата кои се пријавени за гласање. Овие лица ќе гласаат во своите домови на 16.10.2021 (сабота).

Избирачот кој не е во можност да гласа на гласачкото место (немоќно или болно лице согласно Упатството за пријавување и гласање на немоќно или болно лице), а сака да гласа, треба за тоа да ја извести  општинската изборна комисија најдоцна 7 дена пред денот определен за гласање, односно до 9 октомври.

Покрај известувањето до општинската изборна комисија лицето треба да достави во оригинал или копија и медицински доказ за болеста и друга документација (наведени во член 1 од Упатството).

Решението за користење туѓа нега од трето лице, општинската изборна комисија го смета за важечко и кога неговата важност истекла во периодот на распишување на изборите до моментот на пријавување.

Кога избирачот известувањето го доставува до општинската изборна комисија по електронски пат (е-маил или преку апликација), потребните документи ги прикачува кон барањето како скенирани прилози . И овие лица ќе гласаат во своите домови на 16.10.2021 (сабота).