Шеесетина прекршоци и одземен мотор, резултат на акција по гостиварските улици

Мотоциклистите биле во средиштето на неколкучасовна акциска контрола што полицијата ја спровела викендов на гостиварското подрачје. Биле откриени вкупно 58 прекршоци, најмногу некористење заштитна кацига, управување без возачка дозвола и истечена регистрација.

„Сите прекршоци заокружени се со соодветни прекршочни и мандатни платни налози и со глоби, кои зависно од видот на прекршокот, се движат од 50 до 500 евра. Најголемиот број од прекршителите, исто така, ќе бидат повикани на сообраќајна поука, пред се оние кои управувале без возачка дозвола и без потребната заштитна опрема, особено кацига“, информира полицијата.

Покрај ова, поради царински прекршок, одземен бил и еден мотоцикл. Контроли биле спроведени и во Тетово, каде се откриени 71 прекршок.

СВР Тетово најавува дека вакви превентивно-контролни активности ќе следат и во наредните месеци, при што посебен акцент ќе им биде ставен на најчестите прекршоци и годинава, управување без дозвола и заштитна кацига.  Апелот за оваа категорија учесници во сообраќајот останува ист – задолжително да користат кациги и друга заштитна опрема, и да не седнуваат зад волан без претходно положен возачки испит.