Шестмина приведени заради прекршен полициски час во Гостивар

Во земјава во тек е 85 часовниот карантин, но не сите ја почитуваат забраната за движење. Секторот за внатрешни работи Тетово во изминатите 24 часа на полошкото подрачје регистрира 17 прекршувања на полицискиот час.  Во Тетово надвор биле затекнати 11 лица, меѓу кои и двајца албански државјани, на возраст од 25 и 26 години. За нив е констатирано и дека нелегално престојувале во земјава. Странците се задржани во Полициска станица за натамошна постапка. Исто така во Тетово меѓу прекршителите имало и тројца малолетници. Во  Гостивар вкупно 6 лица не го почитувале полицискиот час.

Сите кои не ја почитувале забраната за движење биле лишени од слобода и задржани во Полициска станица, а против нив ќе биде поднесена соодветна кривична пријава, информира портпаролот на СВР Тетово, Марјан Јосифоски.

Изминатото деноноќие во тетовско-гостиварскиот регион Државен санитарен и здравствен инспекторат нема издадено нови решенија за изолација.

Изјави за самоизолација потпишале 9 граѓани, тројца во Тетово и 6 во Гостивар.

Во државен карантин во еден објект во тетовско се сместени 62 лица, а во два објекти во гостиварско 148.