Сојузот на Борци од Гостивар го одбележа 23 Октомври, денот на Македонската револуционерна борба

Со полагање цвеќе на споменикот на Чеде Филиповски – Даме во Гостивар, денес се одбележа 23 Октомври денот на Македонската револуционерна борба. Пред присутните кои се собраа на плоштадот во Гостивар се обрати претседателот на ОО Сојуз на Борци – Гостивар Ратко Ѓиноски. Кој ги потсети присутните на Внатрешната македонска револуционерна организација, формирањето и нејзиното значење до ден денес.

„На денешен ден пред 127 години, се одржа оснивачкиот состанок на МРО во станот на Христо Ботанџиев во Солун. Целта на организацијата била да се бори за автономна Македонија под прогласот „Македонија на Македонците“. Круна на дејноста на таа плејада револуционери беше Илинденското востание, кое претставува значајна историска етапа во борбата на македонскиот народ за национално ослободување со сопствени сили и сопствена држава оставајќи зад себе трајни идеали за македонска слобода. Преку победоносната НОАВМ граѓаните на Македонија ќе го дочекаат и вториот Илинден, 2 август 1944, кога се удрени темелите на денешната македонска држава. Нека им е вечна слава на генерациите револуционери паднати за слободата на Македонија“, наведе во рефератот претседателот на ОО Сојуз на Борци – Гостивар, Ратко Ѓиноски.