Сосема здрав и нискокалоричен десерт без брашно и шеќер

За оние кои не можат да одолеат на десертите и едноставно во денот мора да си каснат нешто благо, постојат многу рецепти коишто ќе ја задоволат таа потреба, а истовремено се здрави и нискокалорични. Овој колач е еден од нив.

Состојки:

120 гр овесни снегулки

250 мл млеко

2 банани

2 јајца

прстофат сол

30 гр какао

1 прашок за пециво

Грст ореви

За глазурата:

100 гр црно чоколадо

50 мл. млеко

Подготовка: Најпрво овесните снегулки потопете ги во млекото (да биде топло) и оставете да отстои 10 минути. Изгмечете ги бананите, па додадете ги јајцата и солта и убаво изматете со жица за матење. Додадете ги какаото, сецканите ореви и прашокот за пециво и продолжете со матење. Кога ќе бидат убаво соединети состојките додадете ги овесните снегулки и повторно добро измешајте.

Смесата ставете ја во огноотпорен сад премачкан со путер. Печете на 180 степени целзиусови 35-40 минути. Откако ќе биде испечен, колачот прелијте го со глазура од растопено црно чоколадо и млеко.