SPB Tetovë: Prindërit që i detyrojnë fëmijët të lypin mund të ballafaqohen me burg

Sektori për Punë të Brendshme të Tetovës përsëri ka rikujtuar dhe apeluar deri te qytetarët e rajonit dhe më gjerë se lypja si dukuri e devijuar shoqërore është në kundërshtim me Ligjin për kundërvajtje kundër rendit dhe qetësisë publike dhe se për këtë lloj kundërvajtje, sipas nenit 24 të këtij ligji është e parashikuar gjobë prej 15 deri në 50 euro në kundërvlerë denarë.

“Prindërit ose kujdestarët që i përfshijnë drejtpërdrejt fëmijët e tyre në lypje ose ndryshe i neglizhojnë ose abuzojnë me ta përballen me përgjegjësi penale dhe mund të dënohen me burgim nga pesë vjet deri në maksimum dhjetë vjet, sipas nenit 201 të Kodit Penal, në varësi të rrethanave dhe pasojat përfundimtare. Sektori për Punë të Brendshme Tetovë, në koordinim të drejtpërdrejtë me institucionet sociale dhe institucionet tjera të zonës në periudhën e ardhshme do të iniciojë dhe zbatojë masa parandaluese dhe të tjera për trajtimin e lypjes, në kuadër të të cilave, ndër të tjera, do të sanksionohen të gjithë personat e përfshirë në dukuri e tillë”, thuhet nga SPB.