Стојаноска: Законот за наставници е штетен и со него нема зголемување на платите

Пратеничката од ВМРО ДПМНЕ Дафина Стојаноска денес во изјава испратена до медиумите потенцира дека Законот за наставници, носи партизација и со него не се зголемуваат платите.

„Законот за наставници кој е на дневен ред денес на собраниската Комисија за образование е Закон со кој се овозможува партизација на образованието и Закон со кој не се зголемуваат платите на наставниците. Зошто СДСМ е заинтересирана за овој Закон? Па сака да го донесе, дури и по цена на кршење на Деловникот за работа на Собранието. Ова е Закон со кој СДСМ предвидува вработување на наставници на неопределено време, без приправнички стаж, со што се укинува еден од механизмите за контрола на квалитет и се овозможува партизација во образованието. Трансформацијата на работниот однос е решена во затворен круг на градоначалникот, директорот кој го именува градоначалникот и кој формира училишна комисија за вработување и комисија за трансформација, која ја формира градоначалникот. Ова е основ за политизација на вработувањата.“, вели Стојаноска додавајќи дека амандманот предложен од ВМРО ДПМНЕ не бил прифатен, Законот како таков е штетен поради што тие нема да го поддржат.