СВР Тетово и општина Гостивар ветија дека кавгите се минато

Со цел, надминување на досегашните недоразбирања и унапредување на меѓусебната соработка помеѓу локалната власт и полицијата. Денеска по иницијатива на Мисијата на ОБСЕ во Скопје, се одржа средба помеѓу градоначалникот Арбен Таравари, началникот на Секторот за внатрешни работи – Тетово, Амир Далипи и командирот на ПС – Гостивар, Гази Абдурахими.

Двете страни се согласија дека меѓусебната соработка е неопходна и со нормална комуникација може да се постигне многу во подобрувањето на безбедноста во општина Гостивар.

– “За досегашното несоработување и разни недоразбирања, можеби вината е обострана. Но, ние треба да гледаме напред и да ги надминеме овие проблеми во интерес на граѓаните на општина Гостивар да воспоставиме ефективна комуникација и соработка која ќе ги даде очекуваните резултати”, изјави градоначалникот Таравари на заедничка прес-конференција по средбата.

Началникот на СВР – Тетово, Амир Далипи, исто така, рече дека имало некои недоразбирања, но дека денес дошле со цел истите да се надминат и да не се повторуваат во иднина.