Вечер и утре, повторно европски фудбал

По неколкумесечна пауза повторно се игра најквалитетниот европски фудбал на фудбалските терени. Вечерва и утре (сабота), со доигрувањето на осминафиналната рунда, сo реванш натпреварите помеѓу Јувентус – Лион, Манчестер Сити – Реал Мадрид, Барселона – Наполи и Баерн Минхен – Челзи, се враќа и Лигата на шампионите, така што месецов нѐ очекува интересна и возбудлива завршница на ова натпреварување на задоволство на сите љубители на европскиот фудбал.

Половина осминафинални средби беа одиграни во март годинава пред Лигата на шампиони да биде прекината поради пандемијата на Ковид-19 вирусот, додека од другата половина осминафинални средби останаа да се одиграат реванш натпреварите.

Според тоа, вечер од 21:00 часот Лион со предност од 1:0 од првиот натпревар му гостува на Јувентус, додека Манчестер сити со предност од 2:1 од гостувањето во Мадрид го пречекува Реал.

Утре на програмата се уште два осминафинални реванш натпревари. Исто така од 21:00 часот Барселона го пречекува Наполи, првиот натпревар заврши без победник 1:1, додека во вториот дуел Баерн, со огромни 3:0 од првиот меч во Лондон, го пречекува Челзи.