(ВИДЕО) Гостиварка со награда за музика на Олимпијада на средни училишта во Њујорк

Средношколката Гентијана Јашари од Гостивар доби награда за музика на олимпијадата Genius – International High School Environmental Project во Њујорк. Се работи за меѓународно натпреварување во кое, со свои проекти учествуваат ученици од средни училишта од над 70 земји од сите делови на светот во различни категории: бизнис, роботика, наука, уметност, музика, литература.

Младата гостиварка ја освои наградата за изведбата на хитот New Rules од Дуа Липа, а на олимпијадата учествуваше и со есеја за подигнување на свеста кај населението за заштита на животната средина и изградба на фабрика за рециклирање на отпад во Гостивар.

По повод својот успех Гентијана беше на прием кај градоначалникот Арбен Таравари.

“Му благодарам на градоначалникот Арбен Таравари, Советот на општината, општинската администрација и иселениците од село Чајле за материјалната поддршка. Исто така им се заблагодарувам на Ебрар Мазар и Бастри Ристеми за снимањето на песната, како и мојот ментор професорката Беса Џафери Садики. Јас во Њујорк не се претставив само себе си или моето училиште, туку го претставив цел Гостивар и ја пренесов мојата порака за заштита на животната средина. Среќна сум што целиот тој ангажман на крајот беше крунисан со успех”, рече наградената средношколка, инаку ученичка во втора година во колеџот „Јахја Ќемал“.