Во Гостивар промовиран проектот: Развој на микро-претпријатија на жени во преку-граничната област

Вчера во Гостивар беше промовиран проектот “Развој на микро-претпријатија на жени во преку-граничната област” кој го спроведува Центарот за управување со Промени (ЦУП) како водечки партнер, заедно со Институтот за човекови права (ИЧП) и Фондацијата – Егалите како партнери на македонска страна.

На промоцијата се презентираа активностите кои ќе се реализираат во склоп на овој проект, со кој се нуди техничка поддршка и разновидни бизнис советодавни услуги во процесот на основање и развој на микро-претпријатиja на жени во прекуграничната област на Полог и Елбасан.

На настанот присуствуваа жени претприемачки од Гостивар и околината, повеќето како претставници на услужниот сектор, како и неколку жени со свои идеи за започнување бизнис од производствен сектор од мал обем и/или услужен сектор. Истите имаа можност да ги претстават своите бизниси, како и да слушнат каква поддрша им се нуди преку проектот. Присуствуваа и претставници од Центарот за вработување во Гостивар, кои исто така презентираа дел од активните мерки кои нудат можност за воспоставување нови и развој на постоечки бизниси со цел подобра координација и усогласено делување со споменатиот проект. Истовемено се дискутираше за сите поголеми проблеми и пречки кои се исправаат на патот на еден добро осмислен систем за развој на микро-претпријатијата во сопственост на жени во полошкиот како и поширокиот прекуграничен регион со Албанија.

Проектот е дел од програмата за прекугранична соработка финансирана од Делегација на Европската унија. Партнер на албанската страна од границата е Центарот за компаративни и меѓународни студии од Тирана.

Периодот на импелементација на проектот е 30 месеци и се реализира во периодот од април 2018 до септември 2020.