Во пораст алергиите меѓу дечињата во Гостивар

 Педијатрите во Гостивар бележат зголемување на пациенти со алергиски симптоми. Со пролетта и цветењето на растенијата, алергиите напаѓаат. Точната бројка на деца од гостиварскиот регион, кои страдаат од алергии не може да се определи, со оглед на тоа дека повеќето се третираат амбулантски. Но, искуствата на лекарите покажуваат дека во последните години, има се повеќе алергични деца. Алармантно е што во пораст, исто така се и случаите на компликации.

Вообичаените симптоми на алергија почнуваат со кивање, чешање на носот, зацрвенување на очите. Педијатрите предупредуваат дека децата треба навреме да се лечат, за да не дојде до компликации, кои може да бидат сериозни. „Најтешката форма е астмата, и за жал кај нас има деца со такви компликации. Родителите мора да знаат дека ако навреме не се лекуваат првичните симптоми, во било кој период во натамошниот развој може да се јават компликации. Според статистиката кај околу 30% од сите алергични деца, има ризик да се развие бронхијална астма“, објаснува д-р Ферид Муча, педијатар во детското одделение на општата болница во Гостивар.

Лекарите ја дијагностицираат алергијата според симптомите и клиничката слика, а причинителот се открива преку специјални тестови.

Во лабараторијата на гостиварската болница се вршат алерголошки тестови со кои се утврдуваат точните причини за појавата на алергии кај секој пациент.