Водата во Тетово да се преврива пред употреба – пронајдени биле бактерии

Лабораториските анализи на примерок на вода од градскиот водовод во Тетово покажале присуство на зголемен број на Колиформни бактерии и Ешерихија коли. „Примерокот е земен на 22 август 2017 во моменти кога хлоринатот беше во дефект и немаше резидуален хлор во водоводната мрежа“, стои во известувањето на Центарот за јавно здравје Тетово. Дефектот бил отстранет истиот ден, по што водата била хиперхлорирана. Резултатите од новите мостри земени по хиперхлорирањето ќе бидат готови во понеделник. До тогаш, стручните служби препорачуваат граѓаните да ја превриваат водата за пиење.

Граѓаните на Тетово велат дека не добиле навремена информација од надлежните за проблемот со водата дента кога настанал и ја користеле водата како и обично. Некои од нив се пожалија дека се соочиле со стомачни тегоби.