„Секој е херој во својата приказна“ – учениците од економското училиште во Гостивар со поучни работилници

Преку интерактивни вежби, креативни игри и активности, средношколци од економското училиште во Гостивар ги учеа своите соученици како да постигнат високо ниво на самодоверба, да ги почитуваат различностите и да се борат против дискриминацијата.

Работилницата беше дел од проект за детски права, а целта е учениците кои беа на обука во Швајцарија стекнатите знаења да ги пренесат на останатите средношколци.

„Во рамки на овој проект релизиравме неколку работилници на тема идентитет, антидискриминација, потоа едукација за штетни последици од одредени зависности и друго. За во иднина планираме и дебати за проблеми кои ги засегаат тинејџерите“, рече ученичката Марија Маркоска.

Средношколката Емилија Србиноска пак ги истакна пораките кои сакаат да ги пренесат преку ваквите активности: „Пораките се едноставни, но силни: Секој е херој во својата приказна и Покрај различностите, ние сите сме еднакви и треба да се почитуваме“.

Директорката Јованка Огњаноска вели дека училиштето особено обрнува внимание на реализирање на проекти кои го поттикнуваат креативниот дух кај децата, им овозможуваат нови искуства и вештини кои понатаму ќе им бидат од корист.

„Основна цел на овие проекти е учениците да излезат од училишните клупи, малку да се тргнат од наставните програми и на поинаков начин да стекнуваат знаења, вештини и искуства“, изјави Огњаноска.

Со денешната работилница беа опфатени четириесетина ученици. Интересно е што во рамки на проектот, средношколците им држеа обука за недискриминација и идентитет и на своите професори.