Златко Димовски и Тања Лепческа, младенци на Галичка свадба 2018

Месната заедница Галичник ги избра зетот и невестата на годинешната Галичка свадба 2018. Младенци на најголемата традиционална културно-туристичка атракција во земјава, оваа година ќе бидат Златко Димовски и Тања Лепческа од Скопје.

Одлуката била донесена едногласно, вчера на седница на Советот на Месната заедница Галичник. Во неа е наведено дека Тања Лепческа е по потекло галичанка и од мала е активна во секоја Галичка свадба. Како и учесник и поддржувач на други културни настани во Галичник. „Во духот на вековната традиција им ја исполнуваме желбата својата љубов да ја крунисаат во Црквата Свети Петар и Павле со галичка свадба на ден 15 јули“, стои во соопштението на МЗ Галичник.

Галичка свадба е најзначајниот настан од Галичкото културно лето и се организира по повод празникот Петровден. Карактеристична е по автентичните свадбарски адети на Галичник и оригинална носијата на невестата, составена од педесетина делови, изработена со филигранска прецизност и тешка 25 килограми.