Кривични пријави против инвеститори и градежни инспектори во Гостивар

Министерството за внатрешни работи информираше за поднесени кривични пријави против повеќе лица, кои се сомничат за бесправно градење во Гостивар и злоупотреба на службена должност.

Надворешната канцеларија за криминалистички работи Гостивар поднесе кривична пријава против 51 годишен жител на Романовце, кумановско, потоа против две лица од Гостивар на возраст од 35 и 40 години, за сторени кривични дела “несовесно работење во службата” и “злоупотреба на службената положба и овластување” како и против 49 годишен гостиварец за сторено кривично дело “бесправно градење”. Според МВР, во периодот од 2015 година до 2018 година во Гостивар, кумановецот, како инвеститор, изградил колективен станбен објект, на кој, спротивно на одобрението за градба, изградил дополнителен кат и поткровје. Второ и третопријавениот, како градежни инспектори во општина Гостивар, не извршеле надзор на наведената градба, со што му овозможиле на првопријавениот да одбегне плаќање на комуналии и други давачки за изградба на наведениот објект, на штета на буџетот на општина Гостивар. Четвртопријавениот, изведувач на наведениот објект, вршел градежни активности на истиот, без основен проект и писмен договор со инвеститорот на градбата.

Градежните инспектори заработиле кривична и за друг случај. Според МВР, во Гостивар на улица “Страхиња Симоноски”, 54 годишен инвеститор, без одобрение за градба, изградил колективен станбен објект, додека 49 годишен изведувач изведувач на наведениот објект, вршел градежни активности без одобрение за градба, основен проект и писмен договор. „Градежните инспектори во општина Гостивар, не извршеле надзор на наведената градба, со што му овозможиле на првопријавениот да одбегне плаќање на комуналии и други давачки за изградба на наведениот објект, на штета на буџетот на Општина Гостивар.“